ସମ୍କର୍ କଥା
ମୁଇଁ କହେସିଁ ଚକ୍ନି ବଲି
ତୁମେ କହେସ ଦନା
ମୁଇଁ ଯେନ୍ଟାକେ ପତ୍ରା ବଲ୍ସିଁ
ତୁମେ ବଲ୍ସ ଭନା
କିଏ କାହାକେ କାଏଁଯେ କର୍ମା
କଥା କହେବାକେ ମନା
ଯେ ଯାହା ବି ଯେନ୍ତା କହୁନ୍
ସମ୍କୁଁ ପଡ଼୍ସି ଜନା
କିଏ କହେସି ପାଚ୍ଲା ଆମ୍
କିଏ କହେସି ଲେତି
କାଁଯେ ଦୁହେ ଗାଲି ଲାଗ୍ସନ୍
ପଦେ କଥାକେ ରେଁତି
ମୋର୍ନ ଅଛେ ପଁଢେଇ ବଏଲେ
ତୁମର୍ ଅଛେ ଜୁତା
ଆମର୍ ନାତି ସୂ ପିଁଧ୍ସି
ଇନ୍ତା ଚଲ୍ସି କଥା
କିଏ କହେସି କବାର୍ ବଏଲେ
କିଏ କହେସି ବୁତା
ଥୁଡ଼େ କହେସନ୍ ଅଏଁଠା ତ
ଆଉର୍ ଥୁଡ଼େ ଲିତା
ଜନେ ରାଁଧ୍ସି ଆମିଲ୍ ତ
ଆଉର୍ ଜନେ ଲେଥା
ସଭେ ବୁଝୁଥିଲେ ସମ୍କୁଁ ପରେ
ଅଏନ୍ ଚଲ୍ସି କଥା
ଆମ୍ବ କହେଲେ ମଜାସେ ଖାଏବ
ଆମ୍ ବଏଲେ ଫିକି
ଦେଇ ପାର୍ବ ସତ୍କେ ସତ୍ ଯେ
ହେବା ବଡ଼୍ ବୁଡ଼୍ବକି
ଜନେ ଧରିଥିସି କରିଆ ଖଁଡ଼େ
ଆର ଜନ୍କ ଅଂଗ୍ଛି
ଇଏ ତାକେ କି ସେ ଇତାକେ
କାଁଯେ କର୍ସି ଛି ଛି
ଗୁଟେ ଦରବ୍ କି ଭାବ୍ କି କାମର୍
ଥିସି ଗୁଟାକେତେ ନାମ୍
ଇ କଥାକେ ହର୍ଘଡ଼ି ଘାଁଟି
ଚୁଛେଁ ହେସୁଁ ବଦ୍ନାମ୍
ଠିକ୍ ଭୁଲ୍ ବଛାନିଛା ନାଇଁ କରି
କରୁଁ ମନର୍ ଭାବ୍ ପ୍ରକାଶ୍
ଇନ୍ତା ଚଲ୍ଲେଁ ଆରୁ ଦିନାକେତେ
ହେବା ଇ ଭାଷାର୍ ବିକାଶ୍
ଚୁଛାକେ କଥା ଜହ ଘାଁଟୁଥିଲେ
ଅଟ୍କି ରହେସି କାମ୍
ନିସ୍ତିଆ ଆରୁ ଗୁଲିହା ମାନ୍କୁଁ
ନାଇଁ ମିଲେ କିଛି ଇନାମ୍
ଯାହାର୍ ଯେନ୍ତା ମନ୍ ହଉଛେ
ସେ ସେନ୍ତେଇ କହୁ
ସବୁ ରକ୍ମର୍ କଥା ଲେଖା ଧରି
ଭାଷା ବର୍କସ୍ ରହୁ
ବହନା ବିଖ୍ନା ବଂଦ୍ କରିଦେଲେଁ
ଫିରି ପାଏମା ଶାଂତି
ଚମ୍କେଇ ଦେବା ହୀରା ଲେଖେନ୍
ଆମର୍ ଭାଷାର୍ କାଂତି
What's Your Reaction?
