ସାରା ଦୁନିଆର୍ ହେମା
ସାରା-ଦୁନିଆର୍-ହେମା
ଦୁନିଆର୍ ସବୁ ଖାଇ ପିଇ ପିଂଧି
ଧରିଛୁଁ ଉନିଆ ବାଟ୍
ବଁକା ଟେଢା ବାଟେ ରେଂଗି ଘେସ୍ରି
ଦେଖାସୁଁ ଚୁଛେଁ ଠାଟ୍
ସମ୍କର୍ ଲାଗି ବଡ଼୍ ହେଇଛେ
ନିଜର୍ ଅଲଗ୍ପନ୍
ଦୁନିଆନୁ ସଭେ ଛଡ଼େଇହେଇ
ଦେଖୁଥିସୁଁ ଦର୍ପନ୍
ମେରୁଖମ୍ ବଁଧା ବଲଦ୍ ବାଗିର୍
କିଂଦ୍ରି ପାଏସୁଁ ସୁଖ୍
କିଏ କେନୁ ଆସି ନେବା କାଏଁ ଶୁଷି
ଆମର୍ ଅବ୍ଗା ଦୁଖ୍
ସାଁକୁର୍ ଭାବ୍ନା ନିସତ୍ ଜାଂଗଲ୍
କରିଛେ ଆମ୍କୁଁ ସାନ୍
ନାଇଁକରି ବୁତା କହୁଥିଲେଁ କଥା
ମିଲୁଥିସି ଅପମାନ୍
ଝାଲ୍ ଲୁହୁ ଛଡ଼ା କାଣା ଅଛେ ଯେ
ଦୁନିଆକେ କିଛି ଦେମା
ଚିଂତା ଭାବ୍ନା ବେଭାର୍ ବଦ୍ଲାଲେଁ
ସାରା ସଂସାରର୍ ହେମା
What's Your Reaction?
