ବହୁତ୍, କମ୍
ଖାଏବାର୍ ଲୋକ୍ ବହୁତ୍ ଅଛନ୍
ଖଟ୍ବାର୍ ଲୋକ୍ କମ୍
ଶିଖ୍ବାର୍ ପିଲା କେତ୍ନିକେତେ
ଶିଖାବାର୍ ଗୁରୁ କମ୍
ମର୍ବାର୍ ରୋଗୀ ଅନେକ୍ ଅଛନ୍
ବଁଚାବାର୍ ଲୋକ୍ କମ୍
ଖଲାନ ଖୁଲା ବଲଦ୍ ଗୋଠ୍
ନାଇନ ମେରୁଖମ୍
ଗାଏବାର୍ କବି ଗଦର୍ଗେଁଡ଼ା
ପଢ୍ବାର୍ ପାଠକ୍ କମ୍
ସଭାଠାନେ ଉଭା କହକା ନେତା
ମାନ୍ବାର୍ ଲୋକ୍ କମ୍
ବର୍ଷିସି ପାନି ରଝୋ ରଝୋ
ବଁଧ୍ କୁଆଁ ଅଛେ କମ୍
ଗୁହୁଡ଼େ ଅଛନ୍ ଚିହ୍ନାର୍ ଜନାର୍
ପକ୍କା ସାଂଗ୍ କମ୍
ଅଛନ୍ ଗୁର୍ଦୁ ଲାଗର୍ଲେସର୍
ନିଜର୍ ମୁନୁଷ୍ କମ୍
ବହୁତ୍ ବୁତା କର୍ବାକେ ଅଛେ
ସମିଆ ମିଲିଛେ କମ୍
ଥିବାର୍ ତକ୍ ତ ଇ ସଂସାରେ
ଧର୍ବାକେ ହେବା ଦମ୍
ଯେତ୍କି ଅଛେ ବହୁତ୍ ଆଏ
କାଏଁ ଯେ ଭାବ୍ମି କମ୍ ?
What's Your Reaction?
