ଦାନ୍କରା
ଯେତେ କମ୍ ଥାଉ ଧନ୍ କି ଦରବ୍
ତହୁଁ ଦେଲେ ଥୁଡ଼େ ବାଁଟି
ନାଇଁ ହେଇଯାଏ ଗରିବ କେହି
ଚୁଛେଇଁ ଗୁଲେଇଘାଁଟି
ଧନୀ ହେବାର୍ ତକ୍ କାଁଯେ ଟାକ୍ମା
ଇଛେନ୍ କରୁଁ ଦାନ୍
ଦର୍କାର୍ ଯାର୍ ଥିସି ତାକେ ଦେଲେ
ନାଇଁହୁଏ ନୁକ୍ସାନ୍
ଧନ୍ ଚୁଛା ଧନ୍ ହେଇ ପଡ଼ିଥିଲେ
ନାଇଁକରେ ଉପକାର୍
ଅଚଲ୍ ଧନ୍କେ ସଚଲ୍ କର୍ବାର୍
କାମ୍ ଏଭେଁ ଦର୍କାର୍
ଘର୍ ଘର୍ ବୁଲି ଯେ ଭିଲ୍ ମାଗ୍ସି
ଭିଖ୍ ହଉ କି ଚାଂଦା
ଲୋକ୍କୁଁ ଭକୁଆ ବନଉଥିସି
ଚଲାସି ନିଜର୍ ଧଂଦା
ଦୁଖୀ ଅଭାବୀକେ ଖୁଜି ବାଛି ଯଦି
କର୍ମା କିଛି ବି ଦାନ୍
ଦୁଖ୍ କମ୍ ହେବା, ହଁସି ଫୁଟ୍ବା
ବଢ୍ବା ଦାନର୍ ମାନ୍
ଦେଲା ବେଲର୍ ଫୋଟୋ ଘିଚିରଖି
ନାଇଁକରୁଁ ତାର୍ ପ୍ରଚାର୍
ଦାନ୍ କରି ଫେର୍ ଦେଖାବାର୍ଟା
ଆଏ ବଡ଼୍ ଅବିଚାର୍
ଯେନ୍ଠାନେ ଜହ ଲୋକ୍ ଜମା ହେଇ
ପଏସା ଦେସନ୍ ଫିକି
ଜଗ୍ଜିହାରି ଦେଖଉଥିସନ୍
ଆପ୍ନାର୍ ବୁଡ଼୍ବକି
ଅଭାବୀ ଦୁଖୀକେ ନୁରି ଖୁଜି ବାଛି
ଦେଲେ ସିନା ହେବା ଦାନ୍
ମାଗ୍ଲା ଲୋକ୍କୁଁ ଡରିମରି ଦେଲେଁ
ଦାନ୍କରା ହେସି ସାନ୍
What's Your Reaction?
