ମନର୍ ଅସଲ୍ ଭାବ୍ନା
ସଭା ହେଲେ ବଡ଼୍ ସବୁ ଗଡ଼୍ବଡ଼୍
କହିଦେଇ ଲୋକ୍ ଭାଗ୍ସି
ଶୁନ୍ଲା ଲୁକର୍ ଟୁଁଡ଼େଢ଼ଁ ତାଲା
ତାର୍ ମତ୍ କିଏ ମାଗ୍ସି
ପ୍ରବଚନ୍ କି ବାର୍ଷିକ୍ ଉତ୍ସବ୍
ପୁରସ୍କାର୍ ବଁଟା ସଭା
ଯାହିଁ ଦେଖ୍ଲେ ବକ୍ତା ମୁଖିଆ
ଶୁନ୍ଲା ଲୁକେ ଗବା
ମତ୍ ଦିଆନିଆ ନାଇଢ଼ଁ ହୁଏ ଯେନ
ସେଠାନର୍ ଲୋକ୍ମତ୍
ଜନା ନାଇଁପଡ଼େ କେତେ ଆଏ ସତ୍
କେତେ ଆଏ ଅସତ୍
ମତ୍ ଯେନ୍ଠାନେ କେଭେଁ ଭିଲ୍ ଦିନେ
ନାଇଁପାଏ ଟିକେ ଆଦର୍
ସେହି ଠାନର୍ ଲୋକ୍ ଆଏଁ ମୁଇଁ
ମନେ ପୁଷିଥିସିଁ ଡର୍
ପାଁଚ୍ ଦଶ୍ ଜନ୍ ଲୋକ୍ ଥିର୍ ହେଇ
କର୍ଲେଁ ଆଲୋଚନା
ତାଁକର୍ ମନର୍ ଅସଲ୍ ଭାବ୍ନା
ସତେଁ ପଡ଼୍ତା ଜନା
What's Your Reaction?
