ନିଜର୍ ଭାଷାର୍ ମାନ୍
ଆଏଁଖ୍ ମୁଜିଦେଲେଁ ଅଏସୋ ଅଂଧାର୍
ଉକିଆର୍ ନାଇଁ ପତ୍ତା
କାନେ ପଡ଼୍ଲେ ଯାହା ବି ଆୱାଜ୍
ମନେ ଥିସି ନିରବତା
ଶିଖିହେସି ସିନା ଶିଖେଇ ନାଇଁ ହୁଏ
କେନ୍ତି ରଖ୍ମା ସତ୍ତା
ଆତ୍ମରକ୍ଷା କରି ଜିଇଁବାର୍ଟା
ଅସଲ୍ ଗୁଟେ ବୁତା
ଯେତେ କଲେ ଭିଲ୍ କେନ୍ସି କାମ୍
କେଭେଁ ନାଇଁଯାଏ ସରି
ସମୁଦ୍ର ଲହଡ଼ା ବାଗିର୍ ଆଏସି
ଗୁଟେ ଆରଟାକେ ଧରି
ଯେ ଯାହା ଯେତେ କର୍ସୁଁ ଇଠାନେ
କଲା ବେଲ୍କେ ବନ୍ଏ
ଲାଗ୍ସି ବଏଲେ, ପାଏଲା ଲୋକ୍ ବି
ନିଶ୍ଚେ ରଖ୍ସି ମନେ
ଶବ୍ଦ ରସିକ୍ ଲେଖକ୍ ପାଠକ୍
ଭାବର୍ ଗ୍ରାହକ୍ ଆ'ନ୍
ସେମାନେ ଚାହେଁଲେ ରଖି ପାର୍ସନ୍
ନିଜର୍ ଭାଷାର୍ ମାନ୍
ଲେଖକ୍ ଲେଖ୍ଲେ ପାଠକ୍ ପଢ୍ସି
ଇଟା ଆଏ ତାର୍ ପ୍ରମାଣ୍
ପାଠକ୍ ପଢ୍ଲେ ଲେଖକ୍ ଦେସି
ଲେଖା ଆଡ଼େ ଜହ ଧ୍ୟାନ୍
What's Your Reaction?
